- Gwelwyd cynnydd yn y nifer sy’n ymgeisio ar gyfer ieithoedd rhyngwladol – cynnydd o 12.1% mewn Almaeneg, 8.9% mewn Sbaeneg a 1.2% mewn Ffrangeg
- Ffrangeg yw’r dewis mwyaf poblogaidd o hyd o iaith ar gyfer Lefel A, wedyn Sbaeneg, ac yna Almaeneg
- Mae nifer yr ymgeiswyr ar gyfer ieithoedd rhyngwladol yn gyffredinol wedi gostwng o’i gymharu â nifer yr ymgeiswyr yn 2019 yn y cyfnod cyn y pandemig.
Dywedodd Ruth Cocks, British Council, Cyfarwyddwr Cymru: “Hoffwn longyfarch y miloedd o fyfyrwyr ledled Cymru sydd wedi derbyn eu canlyniadau heddiw yn wresog iawn. Mae canlyniadau eleni yn destun optimistiaeth, gyda nifer yr ymgeiswyr ar gyfer Lefel A mewn Ieithoedd Rhyngwladol ar gynydd, yn groes i’r duedd ehangach a welwyd mewn pynciau eraill.
“Ond er ei bod yn galonogol i weld y newid cadarnhaol hwn, mae’n rhaid para i fod yn wyliadwrus gan fod nifer yr ymgeiswyr ar gyfer Ieithoedd Rhyngwladol yn gyffredinol wedi disgyn o’i gymharu â’r lefelau a welwyd cyn y pandemig. Fel y nodwyd yn ein hadroddiad Tueddiadau Ieithoedd Cymru diweddaraf yn 2022, mae ieithoedd yn rhan allweddol o ddyfodol Cymru wrth iddi geisio adeiladu a chryfhau cysylltiadau ar draws y byd a meithrin cysylltiadau masnach rhyngwladol.
“Mae ieithoedd yn ein galluogi i weithio gyda’n gilydd ar heriau byd-eang, yn ogystal ag agor drysau i ddisgyblion i ddarganfod pobl, llefydd a diwylliannau newydd a chysylltu’n rhyngwladol. Mae’n rhaid i ni wneud popeth posib i chwifio’r faner dros ddysgu ieithoedd, ac mae’r British Council wedi ymroi i weithio gyda Llywodraeth Cymru, ysgolion ac addysgwyr i sicrhau fod dysgu ieithoedd yn flaenoriaeth.
“Ar ran pawb yn British Council Cymru, rwy’n dymuno’r gorau i bob myfyriwr wrth gymryd camau nesaf eu siwrnai. Mae’r byd wrth eich traed!”
Cyhoeddir adroddiad Tueddiadau Ieithoedd Cymru nesaf y British Council yn yr Hydref. Cewch fwy o wybodaeth am adroddiadau Tueddiadau ieithoedd Cymru yma: British Council Cymru - Tueddiadau Ieithoedd Cymru