Cwrdd ag aelodau'r pwyllgor

Delyth sy'n gyfrifol am holl wasanaethau newyddion a materion cyfoes BBC Cymru Wales - arlein, ar gyfer dyfeisiau symudol, ac ar radio a theledu. Mae'n arwain tîm o newyddiadurwyr sy'n gweithio ledled Cymru ac yn San Steffan. Cyn hyn, Delyth oedd Golygydd Gwleidyddol BBC Cymru Wales ac yn 2018 cafodd ei phenodi'n Olygydd rhaglen BBC Wales Today. Rhwng 2013 a 2014 bu Delyth yn gweithio fel Uwch Reolwr Cyfathrebiadau ar gyfer BBC Cymru Wales. 

Mae Ffion Thomas wedi cael gyrfa eang ac amrywiol ym meysydd gwasanaeth cyhoeddus a chydweithio byd-eang; mae ganddi brofiad helaeth o lywodraeth ac mae wedi gweithio i Lywodraeth Cymru, Llywodraeth y Deyrnas Unedig a'r Cenhedloedd Unedig. Mae ganddi brofiadau ehangach hefyd o weithio yn y sector technoleg, ac fel entrepreneur - gan sefydlu ei chwmni cynhyrchion cynaliadwy ei hunan.

Dechreuodd Zenny ei gyrfa yn yr Adran Gwaith a Phensiynau cyn ymuno â Llywodraeth Cymru yn 2001. Mae wedi dal amryw o swyddi ym meysydd llywodraeth leol, addysg, cyflogadwyedd a sgiliau a deddfwriaeth. Bu Zenny hefyd yn gweithio ar secondiad i Lywodraeth y Deyrnas Unedig am 5 mlynedd yn cefnogi gwaith Ysgrifennydd Gwladol Cymru ar weithredu setliad datganoli Cymru.

Mae Ali Abdi wedi cydlynnu'r broses o ehangu mynediad i astudio a chyflogaeth ym Mhrifysgol Cymru yn fedrus, gan hybu ymwybyddiaeth o lwybrau gyrfa, hwyluso gwaith ymchwil rhwng academyddion a chymunedau lleol ac arwain gweithgareddau mentora a modelau rôl. Mae wedi gweithio'n effeithiol i hyrwyddo cyfleoedd i oedolion ifanc a merched a chynyddu ymwybyddiaeth o gydraddoldeb, amrywiaeth a chynhwysiant.

Bu Eluned Hâf yn newyddiadurwr ac yna'n swyddog y wasg i Grŵp Y Gwyrddion a Chynghrair Rydd Ewrop yn y Senedd Ewropeaidd, cyn sefydlu 'una cyf' - cwmni diwyllianol yn arbenigo mewn polisi a phrosiectau Ewropeaidd. Eluned oedd cyd-arweinydd WOMEX yng Nghaerdydd yn 2013, ac arweiniodd fenter Showcase Scotland Spotlight Cymru 2022-24. 

Mae Jane yn gyfrifol am ysbrydoli a hybu uchelgais, creadigrwydd a chyfeiriad strategol y sefydliad. Bydd gwireddu Strategaeth 2030 yn ganolbwynt i waith Amgueddfa Cymru - gan sicrhau bod y teulu o saith Amgueddfa Genedlaethol a'r Ganolfan Gasgliadau yn diwallu anghenion cyfnewidiol ac amrywiol cymunedau Cymru.

Mae Jeff yn uwch arweinydd profiadol iawn sydd wedi ennill enw am ei ddull meddwl annibynnol, ochrol a strategol. Dechreuodd ei yrfa'n dysgu Ffrangeg, Lladin ac Addysg Gorfforol yn Ysgol Oakdale yng Ngwent. Wedi hynny bu'n Bennaeth Adran yn Ysgol Uwchradd Llanrhymni yng Nghaerdydd cyn gweithio ar gynllunio a gweithredu'r Cwricwlwm Cenedlaethol. Bu'n hyfforddi darpar athrawon ar y cwrs i ôl-raddedigion ym Mhrifysgol Abertawe.

Mae Najima Hashi yn gweithio ar weithredu cytundeb rhyngwladol i Lywodraeth Cymru yn ogystal â rheoli Rhwydwaith Cyn-fyfyrwyr Academi Arweinyddiaeth Cenedlaethau'r Dyfodol. Mae gan Najima radd mewn Cysylltiadau Rhyngwladol ac ôl-radd mewn Diwylliant, Alltudiaeth ac Ethnigedd. Mae'n angerddol am ddatblygu cynaliadwy a mentrau hybu cydraddoldeb. Mae Najima yn aelod o Bwyllgor Llywio Cynghrair Hil Cymru ac yn aelod o fwrdd menter gymunedol Fair Jobs CIC.

Mae Susana'n gyfrifol am strategaeth, cyflawniad a pherfformiad cyffredinol rhaglen Taith. Mae'n gweithio gydag uwch staff yn Llywodraeth Cymru a'r sectorau targed i hyrwyddo buddiannau a gwerthoedd y rhaglen ledled Cymru ac yn rhyngwladol. Ymunodd Susana â rhaglen Taith ar ôl gweithio i'r British Council mewn nifer o swyddi rheoli ac arweinyddiaeth mewn gwahanol wledydd yn Nwyrain Asia, Affrica Is-Sahara ac yn y Deyrnas Unedig.

Penodwyd yr Athro Paul Boyle yn Is-Ganghellor Prifysgol Abertawe yn 2019. Cyn hyn, roedd yn Llywydd ac yn Is-Ganghellor Prifysgol Caerlŷr. Yn flaenorol, Paul oedd Prif Weithredwr Economic and Social Research Council (ESRC) ac yn Llywydd Science Europe, gan gynrychioli dros 50 o asiantaethau ariannu Ewropeaidd.