Gall athrawon ysgolion cynradd nawr defnyddio cerddoriaeth a drama i helpu eu disgyblion i ddysgu Sbaeneg a Chymraeg trwy ddefnyddio gwefan newydd, rhad ac am ddim i'w defnyddio.
Mae gwefan Cerdd Iaith yn cynnwys mwy na 30 o weithgareddau, fel gemau drama syml a chaneuon mewn tair iaith.
Darperir popeth sydd ei angen ar athrawon i arwain disgyblion trwy'r gweithgareddau, gan gynnwys cyfarwyddiadau llawn, fideos arddangos, cerddoriaeth ddalen y gellir ei lawrlwytho, geiriau, ffeiliau sain ac awgrymiadau ar gyfer ymestyn a myfyrio.
Dywedodd Rebecca Gould, Pennaeth Celfyddydau British Council Cymru: “Mae Cerdd Iaith yn adnodd newydd a phwerus ar gyfer athrawon cynradd sy’n anelu at daclo’r dirywiad mewn dysgu ieithoedd tramor modern mewn ysgolion. Bydd y gweithgareddau’n ysgogi a thanio brwdfrydedd plant i ddysgu’n weithredol a siarad ieithoedd newydd yn hyderus. Mae’r wefan yn llawn dop o gynnwys gwreiddiol i gyffroi’r dychymyg. Mae’n hawdd i’w defnyddio ac rydyn ni’n gobeithio y bydd athrawon yn manteisio ar y cyfle i archwilio a phori drwy’r gweithgareddau.Rwy’n credu y gwelan nhw ei fod yn adnodd delfrydol i helpu gyda’r her o ddysgu plant gartref. Byddwn hefyd yn argymell y wefan i rieni sy’n chwilio am weithgareddau addysgol llawn hwyl i’w defnyddio gyda’u plant".
Addasrwydd i oedran
Cafodd yr adnodd ei gynllunio i’w ddefnyddio gyda disgyblion cynradd rhwng 7 – 11 oed. Bydd yn arbennig o ddefnyddiol ar gyfer disgyblion Blwyddyn 6 sy’n paratoi i symud i’r ysgol uwchradd a gwersi ieithoedd tramor modern, ond mae’n addas i’w ddefnyddio gyda dysgwyr iau hefyd.
Ymwelwch â’r wefan
Sut dechreuodd hwn
Dechreuodd Cerdd Iaith fel prosiect addysgu creadigol i archwilio dulliau newydd o ddysgu cerddoriaeth ag ieithoedd mewn ysgolion cynradd yn Ne a Gorllewin Cymru. Cafodd y prosiect gwreiddiol ei gyflwyno gan British Council Cymru mewn partneriaeth gyda Cherddorfa Genedlaethol Gymreig y BBC, Yr Athrofa – Addysg i Gymru ac Ein Rhanbarth ar Waith (ERW). Ariannwyd y fenter gan Gronfa Datblygu Athrawon Sefydliad Paul Hamlyn.
Cafodd y caneuon eu creu’n arbennig ar gyfer Cerdd Iaith gan y Prifardd, Mererid Hopwood a’r cyfansoddwyr, Gareth Glyn a Tim Riley.
Rhaglen hyfforddi athrawon
Mae arweinwyr y prosiect wedi bod yn gweithio gyda cherddorion, ieithyddion, ymarferwyr drama ac athrawon o Dde a Gorllewin Cymru am y tair blynedd ddiwethaf. Maent yn cyflwyno hyfforddiant yn yr ysgolion a’r tu allan iddynt fel rhan o ddatblygiad proffesiynol parhaus athrawon. Mae’r hyfforddiant hwn yn cynnwys gweithgareddau dysgu creadigol a gall hefyd gynnwys ymarferwyr creadigol sy’n dod i mewn i ysgolion i arddangos y gweithgareddau’n uniongyrchol.
Mae’r wefan Cerdd Iaith yn cefnogi athrawon gyda’r gwaith o adeiladu ar sgiliau Cymraeg a Saesneg y dysgwyr wrth gyflwyno trydedd iaith yn y dosbarth – gan ateb gofynion Maes Dysgu a Phrofiad Ieithoedd, Llythrennedd a Chyfathrebu’r Cwricwlwm Newydd i Gymru. Bydd yn ysgogi ac yn ennyn brwdfrydedd plant i fynd ati i ddysgu a mwynhau siarad ieithoedd Newydd.
Mae’r adnodd yn cyfannu ac ymestyn y rhaglen hyfforddi sy’n cael ei ddarparu gan y British Council, ond gellir ei ddefnyddio yn annibynnol hefyd